No comments yet

MINO HLACAWNNAK KONG HE PEHTLAI IN BIAHAL MI LEHNAK (PART I)

Nifatin riantuan, rian kawl le sianginnkai cio asi caah hlacawnnak itel hi ahar chin lengmang. Zaan ah asi fawn tikah, mino tampi caah cun thabat hnu ah thazang van chuah ahar ngaingai tawn. Sihmenhsehlaw, kan hawile zeimzawzat hna cu “Ninga Zaan” aphak chiarte hlacawnnak ah an itel hna. Hi hlacawnnak thawng in pumpak cio nih an hmuhton mi le ruahmi siseh, taksa, thinlung le thlarau caah hlawknak an hmuh mi kong biahalnak kan ngei i, cu biahalnak hna cu mah lungtho tein atel duhmi hna nih lehnak an tuah hna i a chang tete in kan rak tarlangh hna.

Biahalnak: Choir na cawn le remhnak thawng in taksa, thinlung le thlarau caah zeibantuk thathnemnak le hlawknak hna dah na hmuh?

Bia lettu: Jaymoon Thawngkhua Thang “Hlarem cawngmi siseh hlarem cawn hruaitu pawl an diklo tuk le hlarem cawn ka huam ekceh ti loh!” tiah a luancia kum khat ahkhan hla cawng huaha loin faak nawn tein ka rak zai. Cuticun, nikhat hnu nikhat mino he kai hlat chin vima. Hla ka rak cawn caan chunte ahkhin, “Phone an dek tuk! Hruaitu pawl hruai ning an thiam lo tuk! Midang buu cu an lung ai rual ning khih. Hruaitu pawl a-leih an theih ning. Cu nute holh tam cu. Pa fafa nih ava holh ve. Phone a dek peng hoi lai…” tibantukin mi congoihnak bia tomtom he inn ah ka rak lawi zungzaal.

“Thatlonak (negatives) atamtuk tik ahhin thatnaklei (positives) nihhin kan nunnak ah umnak a ngei tawn lo.”

Jaymoon Thawngkhua Thang

Fiang tein theihmi cu ram tthangcho ram ahhin hnabeidonghnak, vansannak, lungretheihnak, le lungzawtnak tibantuk hi arak tamdeuh hrimhrim ko. Nikhat a hung chuak sianginn kaimi sianginn kai le rian ttuanmi nih rianttuan cio. Kal le lawi in thihnak lei kan kal vima mi hi ruah ahcun nunnak hi pakpalawng bak khi asi tak ko.

Bialet tu: Jaymoon Thawngkhua Thang

Sianginn kaimi ka si tikah ka caa kong he pehtlai in ka lungre a thei ngaingai. Cunihcun, nifatin ka nunnak ah faak piin rian a ttuan. Hawi he um duhlonak siseh, mino he ipehtlaih duhlonak tibantuk le mahlawng in khuaruah tibantuk hna an si. Apoi tukmi pakhat cu, ihnakkhaan um i mahlawng khuaruah tluk in a chiami thil a um lai lo. Depression ngei lomi caah 70% cu depression ngeihnak asi i, depression ngei cangmi hna caah 60% hi thihnak lam ah kalpi tu asi kho ve.

Cuvialte lungretheihnak, hnabeidonghnak, vansannak, le lung zawtnak vialte teinak lam ah lam pakhat a sive mi cu hlarem cawn (Mi sin i chuah le langh) hi a si. Hlarem kan cawn tikah taksa, thinlung, le thlarau in hlawknak kan hmu dih. Lungretheihnak (stress) te hna hi mahte in tei khawhmi asi hrimhrim lo. Ni fatin kan nunnak ah hawi dang he ai kom lomi tu hna khi kan stress deuh khun cuh! Kan lungdong hlei cuh! Kan bia chim a chia hlei cuh! Mi kong kan ceih khun cuh! Cu vialte funtom tikah kan fim lo khun tinak a si. Cucaah, hlarem ka cawnnak nihhin taksa hrimhrim in hlawknak siseh, nifatin ka nunnak ah kau deuh in khuaruah khawhnak, hawi dang he biaruah khawhnak lam aka sialpiak hlei ah, mi soi tete hna zong aka hmanter lo deuh. Cu nih cun, thinlung damnak a kan pek i kan thinlung adamnak thawngin kan taksa zong a dam. (A dik tuk) God is so good!!!

Thlarau lei hi cu chim a hau lo. Bawipa nih a dawtmi a fa le cu chiatnak an tuah tikah a fabik te zong ai ciin i a chimh hrin hna. Cuvebantukin, Bawipa caah kan tuahmi tthatnak fate ruang ahhin nifatin ka nunnak ah thluachuahnak mit hmuh kut tongh bakin a ka pek zungzaal ko. Hlarem ka cawn ruangah ka dam. Hlarem ka cawn ruangah hawikom ka ngei. Hlarem ka cawn ruangah ka hmuhnak, theihnak, le ruahnak a kau deuh. Bawipa sunparnak caah si dih ko seh!

Keimah bantuk si na duh ve ahcun, hlarem rak cawng ve.

Bawipa nih an dawt tuk!

“Bawipa sunparnak caah kan nunnak hi kan hman ahcun pakpalawng asi mi nunnak hi ai dawh tukmi nunnak ah a canter ko lai.”

Post a comment