No comments yet

SUNDAY SCHOOL CANHMANNAK (10 MARCH 2019)

 

VCBC, Melbourne: March 10, 2019 Mino Zaan Pumhnak ah Sunday School a kai liomi hna caan an hmang kho. An thiamnak, a cawnmi le theihmi hna a phunphun an kan hmuhsak. Tha a nuam i, a sunglawi tuk hringhran. Kan Krihfabu dirhmun le hmailei ah kan miphun nih kan va phak khawhte dingmi hna khi an cawlcanghnak tete in a langmi hna an um tikah lung a hmui, tha a nuam khun. Apum kho mi mizapi hmai an cawlcangh le thutdir ning hna hmuh tikah hngakchia tete an si ko hna nain, mah le mah zumhnak an ngeih ning, pumpak nih tuanvo an lakmi le an tuahmi zawn cio ah a thabik siding in zuamnak an ngeihmi lungput hna zong hmuh khawh an si.

Atu lio kan Krihfabu ah Sunday School kai liomi hna hi 300 renglo an si cang tikah, pumhnak i caanhman ding tibantuk asi ahhin a rethei bik mi hna cu cawnpiaktu hna an si. Sihmenhsehlaw, zoh dawhte le a thabik chuah in an i zuamnak nih tlamtlinnak a chuahter mi hmuh tikah upat tlak taktak an si. Hngakchia hna tha tein thithruai khawhnak ahcun dawtnak, zawnruahnak le lungsaunak hna a ngei kho mi si a herh. Cucu, mi tampi nih kan ngeih khawhlo mi an si hna. Asinain, kan Sunday School cawnpiaktu hna cu an ngeih lawng hmanh siloin, an cawnpiak mi hngakchia hna cungah atak bak in an langhter khawh. Cucu, Pathian an tihzahnak le Krih lungput an ngeihmi a langh khunnak a si.

Sunday School kaimi kan fanau le hna hi ram thangcho cangmi ah a chuakmi le a thanglian mi an si hlei ah, atu tiang Chin miphun dirhmun ahcun caawnnak a ngeibik mi le a pehtlai bik mi hrinsorphu (most educated and connected generation) zong an si hna. Vawlei fimthiamnak, Krihfa biaknak kong he pehtlai in an theihmi zong a kauh tuk tikah an nolio tein cawnpiaknak tha an cohlan khawh hi a biapi taktak mi a si. Aruang cu, hmailei ah hi hna phu nih hin zei lam dah an zulh lai, zeibantuk minung dah an si lai tibantuk hna hi atu an hngakchiat lio umnak innchungkhar, zatlang le Krihfabu ah tampi a hngatchan mi a si. Hringtu an nulepa hna zong nan biapit tuk lio caan a si. Thancho lam a phanh chin lengmang mi,  a nuam i thluachuah a hmu chinchin mi Krihfabu le chungkhar kan sinak hnga caah kan mah le kan tuanvo cio ah ttanlak in thazang chuah ding zong kan in sawm hna.

Sunday School caan an hman zaan ah an cawlcanghnak hmanthlak hna zong a tanglei ah zoh khawh a si. Hmanthlak Zohnak (hmet)

Post a comment