No comments yet

NMKF President Rev. David Van Dawt Thawng he Biaruahnak

November 25,  2018 (Zarhpi Nii) cu Nichuah Melburne Krihfabu Funtomnak (NMKF) chuntel dihlak Victorian Chin Baptist Church (VBC) Biakinn ah pumttinak ngeih ding a si. Tutan hi avoi khatnak NMKF chungtel hna Pathian thangthatnak a si caah, mah hi buu cu zeidah a si, hote dah chungtel an si hna, zeibantuk rian dah an tuan tibantuk theih nan duh cio lai tiah zumhnak kan ngei. Cu caah, atu lio NMKF ah president a tuan lio mi Rev.  David Van Dawt Thawng (VCBC) biaruahnak kan tuah mi kan rak tarlangh.

RNC: Nichuah Melbourne Krihfabu Fontomnak (NMKF) cu zeibantuk bu dah a si?

VDT: NMKF cu Nichuahlei Chin Khrihfabu hna chungin bu 8 nih chiat/that ni zohkhenhnak caah tiin fonh i dirhmi bu a si.

RNC: Nichuah Melbourne Krihfabu Fontomnak (NMKF) cu zeitindah nan rak dirh? Zeitikdah nan rak dirh?

VDT: NMKF dirh khawhnak ding caah saduhthahnak cu a rak sau ngaingai cang nain, tlam a rak tling kho lo. Nichuahlei kan dirhmun zoh lengmang tik ah, Khrihfabu pakhat le pakhat kan i pehtlaihnak a thawn deuh khawh nakhnga ding le taksa, thinlung, le thlarau ah a thangcho mi kan si khawh nakhnga caah ifuntom a herh ko tiah ruahchih mi chung in tonnak (meeting) tuah a rak si. Hi tonnak cu VCBC tlangtlaknak in tuah a rak si i, Khrihfabu (8) nih lungtlinnak rak ngeih a si. Cuti cun, Nichuah Melbourne Krihfabu Funtomnak (NMKF) cu February 2018 ah rak dirh a si.

RNC: NMKF nih a tinhmi le a tuanmi zeidah an si?

VDT: Nichuah Melbourne Khrihfabu Funtomnak nih a tinhmi cu chiat/that ni ah pakhat le pakhat i kilkamh, zohkhenh, taksa, thinlung, le thlarau ah ngandam khrihfabu  si hi a tinh bikmi an si.

RNC: Atu tiangah NMKF chungtel Krihfabu hna zeizatdah an si cang? Chungtel tling sikhawhnak hnga caah zeibantuk hna dah an herh?

VDT: NMKF chungtel hi Krihfabu  (8) kan si cang. Kan dihlak in Hakha Chin holh a hmangmi khrihfabu lawngte kan si . Chungtel luh khawhnak caah a herh mi cu NMKF chungtel Khrihfabu asi mi paoh nih, an Khrihfabu  chungtel minung pakhat caah AUD 5 pek a si. An Khrihfabu chungtel dihlak hna caah minung pakhat AUD 5 ca tuak in a buu in phaisa thawh a si. (Tahchunhnak ah: Atu lio ah VCBC hi chungtel 1100 leng kan si caah, minung pakhat AUD 5 ret in tuak cun NMKF ah kan thawh dingmi dihlak hi AUD 5, 500 a si).

RNC: Zeitindah hruaitu upa an thim i, rian an i phawt hna?

VDT: Chungtel dihlak hi Khrihfabu (8) kan si hna i Krihfabu pakhat in minung pathum cio upa ah telh an si. Hi hruaitu upa hna cu khrihfabu hotu, chungtuan le pastor pakhat (pastor ngeilo mi nih an ngunkeng) an si. Chungtel hi Khrihfabu 8 kan si ko nain, OC caah cun minung (6) lawng thim kan si. Hmailei ahcun khrihfabu (8) a fun mi kan si caah OC hi Khrihfabu pariat chungin pakhat cio telhchih a tha tiah keimah pumpak cun ka ruah.

RNC: NMKF a riantuannak caah a herhmi phaisa zeitindah nan kholh?

VDT: Riantuannak thawng ngai  in a kal khawhnak hnga caah phaisa a herh bantukin, Khrihfabu pakhat cio nih an chungtel minung pakhat caah AUD 5 an thawh mi phaisa hi kan riantuannak caah kan hman.

RNC: NMKF dirhnak kong he pehtlai in harsatnak tonmi an um maw?

VDT: Atu tiang ahcun a umlo ti khan asi ko nain, Khrihfabu pakhat ah lutlai hruaitu chungin thim kan si tikah tonnak (meeting) auh duh ah hin kan Krihfabu cio calendar zoh in kal a hau i mah cu a harsa deuh ngai tawn. 

RNC: Mizapi nih NMKF a riantuannak an hmuh ning?

VDT: Mizapi hmurka in a chuak mi cu, tuante hmanh in rak dirh cang ding a si an ti. Atu tiang  ahcun, NMKF riantuannak hi a tha tuk an ti cio caah, kan rak dirhmi cu kan ifuh tuk tiah kan ruah. Hmailei zong ah thathnemnak tampi a chuah pi lai tiah ka zumh.

RNC: Chungtel dihlak caah MNKF a thathnemnak?

Ans: Chiat nii, that nii ah kan i tlangtlaknak siseh, kan nau le umnak ngeilo in avak mi hna caah cawnpiaknak (camping) kan tuah piakmi hna thawng in thiltha le theipar tha an chuak. Cucu, chungtel kip kan ca cio ah a thahnem tuk tiin kan hmuh.

RNC: NMKF ah VCBC Krihfabu in aiawhtu minung zeizatdah nak itel, zeibikdah nan tlaihmi cio an si?

VDT: VCBC aiawhtu hna hi minung pathum kan si. Kan krihfabu hotu, chungtuan le keimah kan si. Kei hi NMKF EC nih president an ka thim caah ka tuan cuahmah lio a si.

Post a comment