No comments yet

MINO HLACAWNNAK HE PEHTLAI IN BIAHAL MI LEHNAK (PART II)

Pumpak herhhai le manhlonak ram ah hin Krihfabu mino hlacawnnak ah itel le caanpek te hna hi ahar chin lengmang. Tikah, mino tampi cu kan rian, cawnnak le thil dangdang hna ruangah hawisin hlacawnnak ah kan chuak kho tawn hna lo. Cucaah, kan hawile mino hlacawnnak ah atel kho mi hna nih manhlo le caanpek hartuk lio zongah an tenhchih tawnnak a ruang theih hi pumpak kan ca cio ah thazang petu an si theo lai tiah biahalnak kan tuahmi hna pakhat hnu pakhat kan rak tarlangh hna.

Tutan kan biahalnak lettu hi kan Krihfabu pumhnak ah Projector a kan tlaihpiaktu Za Tin Sung a si. A cungah lawmhnak tampi kan ngei.

Biahalnak: Hlarem (choir) na cawnnak le hlaremsak thawng in taksa, thinlung le thlarau he pehtlai in zeibantuk thathnemnak le hlawknak hna dah na hmuh?

ZA TIN SUNG : VCBC mino ah kai telnak le ka luhnak hi kum 4 chung ka luh lio a si. Kei cu Khrihfabu pumhnak ah projector ka tlaih pah tikah, caan tampi cu hla ka cawn ko zongah ka remh kho tawn lo. Asinain, ka cawnnak thawng lawng hmanh in taksa, thinlung, thlarau thanchonak he pehtlai in miaknak le tthathnemnak tampi ka hmuh hna.

A hmaisa bikah, hawikom le mitheih hngalhmi tampi ka ngeih hi mino sin kai telnak thawng in a si. A bikin in, hlarem ka cawnnak nihhin hawikom tampi serkhawh nak can ttha a ka pek tiah ka hmuh. Hawikom le theih hngalhmi tampi umnak ahcun a nuam i cawn chin lengmang nak dingah thazaang tampi ka lak lawng si loin, thinlung zong a hliphlau ter. Cun, mino hna sin ka chuahlangh tik ahhin ka khuaruahnak, hmuhnak le theih hngalhnak an kau deuh i an thuk deuh. Cu hna cu taksa leiin hlawknak nganbik ka hmuhmi an si.


BIALETTU: ZA TIN SUNG (SUNG SUNG)

Sianghleiruun kaimi ka si tikah ka caa kong he pehtlai in lungdonghnak le lungretheihnak phunzakip ka ngei hna. Cu pinlei ah, rian lei zongin ka lung ngandam lonak tampi an um tikah ka lung a dong tawn. Asinain, hawi le kom, nu le pa asiloah, mah lungtho tein hlarem hlacawn kai thawh tikah lung ngandamnak ka hmu.

Hlacawn kan thok hlanah siseh, dinh caan tete ah mino hna he ton biaruahnak le ipehtlaihnak ka ngeih tikah ka lungchung ummi hna hrawmhttinak caan ttha ka ngei kho. Cu tikah, thazaang an ka pek, ruahnak tete an ka cheuh, nuamhnak bia hna an ka hrawmh ve tikah ka thinlung a dam tuk i ka lungretheihnak le ka lungrawhnak hna cu an zaang deuh. Cu tlukin a nuammi um la loh!  

Thlarau in hlawknak ka hmuhmi hna cu chimcawk an si lo. A hlanah cun, mino hna hlarem kan cawn dih in thlacam ttinak kan ngeihnak nih ka thazaang der caan ah thazaang tampi a ka pek. Cu caan ahcun, pakhat le pakhat caah siseh, mino dihlak hna caah thla kan cam tti tikah a nuam tuk in ka thei. Cu pinah, Pathian lei ah kar ka hlaan chinnak dingah thazaang nganbik a ka petu a rak si tawn. Cu lawng siloin, Pathian hla kan sak dingmi hna nih ka thlarau caah thazaang tampi an ka pek. Hlarem ka rak cawn kaa teah cun a bia ruat setsai loin saksawh in ka rak sak tawn. Cu tikah thlarau leiin thazaang ka laa lo. Asinain, atu ahcun hlacawn kan thok hlan deuhah kan sak dingmi hlabia khi a hram in a dongh tiang rel tanak ka ngei tawn. Pathian nih thlua a chuah cangmi hlabia hna nih nifatin bible ka rel i thazaang tampi an ka pek bantukin, ka nunnak ah a thar in thazaang an ka pek ve. Cu nih cun, Pathian ka dawtnak an fehter deuh i Amah Pathian lei ah ka zumhnak thuk chinchin in kar a ka hlanter.

Mino hna, hlarem cawn le hlaremh hi Pathian rian kan ttuan a si tikah kan hngalh khawh lomi pin lei ah Pathian nih relcawk lo thluachuah a kan pek hna. Hlarem ka cawn ruangah ka ngaih a chia bal lo, ka lungre a thei bal lo, lawmhnak tuin ka khat. Kan i manhlo caan tete ah siseh, kan huamlo caan ah kan i hnek khawhmi khi alak an si bal lo. Pathian nih an philh piak lo i thluachuahnak tampi an pek ko (lai).

Cucaah, na no liote ah Bawipa caah ipe chin law, hlawknak tampi na nunnak nih a hmuh hrimhrim lai. Mino hna, sau kan no ti lai lo. Hlarem rak cawng ve hrimhrim law nangmah pumpak tein a nuamh le a tthat hi rak tep ve. Kan siaherh tuk! Kan caan sunglawi kan pekmi hna hi a lak an si lai lo. Bawipa vel le daihnak cu pumpak nan cung cio ah um ko seh!

Post a comment