No comments yet

Lutuv Baptist Church ah VCBC Mino Gospel An Tlawng

11 November 2018: VCBC Mino hna cu kumkhat chung an cawlcanghnak ah a telmi pakhat, lenglei Krihfabu hna hawikomhnak timi he pehtlai in Lutuv (Lautu) Baptist Church ah an tlawng hna i hmunkhat ah Pathian thangthatnak an ngei kho.

Lutuv (Lautu) Baptist Church (LBC) cu Melbourne nitlak lei ummi Keilor City Church ah Pathian thangthatnak a ngeimi an si. Melbourne nichuah lei um mi VCBC Krihfabu he cun suimilam pakhat tluk mawtaw in a rau.

Zei caah dah Lautu Krihfabu theng hi tlawn ding in na thim ti kan hal hna tikah, “Lutuv (Lautu) Baptist Church thengte tlawnding in kan rak thimnak cu, Melbourne ah a um mi Chin Krihfabu tampi hna hi kan tlawnpah ngai cang hna. Cheukhat Krihfabu cu voihnih kan tlawn cangmi hna zong an um. Asinain, Lautu Krihfabu hi voikhat hmanh kan tlawn khawh rih hna lo caah kan thimnak a si. Hi tlawnkainak he pehtlai in Lautu Krihfabu lei hruaitu hna zong nih zeihmanh harsatnak umlo tein an kan cohlan caah kan ilawm”, tiah VCBCY hotu Van Za Tling nih a chim.

“Mah hi Gospel tlawnnak ding caah timhlamhnak tha tein kan ngei. Hlaremh dingmi cu zarhthum hrawng kan cang i, kan sakmi hla hi T. Hre Uk nih a phuahmi ‘Phun Awk le Sak Awk’ timi a si. Mino a kal mi zong minung 60 leng kan si caah Van paruk kan hlan i, upa cheukhat hna cu pumpak mawtaw in an kal. Krihfa Upa chung in Upa Pu Lal Lian Bawi zong nih a kan zulh,” tiah VCBCY chungtuan Robert Hram Hlei Cung nih media phu sin ah a chim.

Tutan Lutuv Baptist Church kal cu kan i ngaih ngaingai. Hawikom thar ser lai le lamhlatnak ah khualtlawn hi kan i ngaih bikmi an si, tiah Za Za, Sophia le a kalmi dangdang hna nih kal lai itonnak ngeihlio ah a lungthawhnak an chim.

“Pumhnak caan an rak kan pekmi chungah, Praise and Worship a telchih kan theih hi atlai deuh ngai caah caan tlawmpal chung telawng timhlamhnak kan ngei manh. Asinain, kanmah lei kan sikhawhnak bik le a thabik in timhlamhnak kan ngei, kan i zuam ko,” tiah P&W hruaitu Sui Tha Hngel Cinzah nih ati.

VCBC Mino Pastor Van Hei Lian nih thawngtha an kan chimh. Kan phaknak hmunkip, kan tuahmi thil hna le nifa kan nunnak ah cite bantuk in al-mi si ding le midang caah kan nun in thawngtha chim khomi kan si khawhnak hnga caah Pathian bia in a kan forhfial.

Pumhnak a dihlei kam kan phak ah, khual in a rak tlawngmi hna le inntek Krihfabu mino hna ai-awh in hruaitu hna laksawng i thlennak zong an ngei. Pumh a dih bak in, inntek le khual dihlak hmunkhat ah zanriah dumtinak le hawikomhnak zong an ngei kho.

Lutuv Baptist Church (LBC) krihfabu cu 2010 ah rak dirhmi a si. 01 January 2015 thok in atu tiang Keilor City Church ah pumhnak an ngei. Atu tiang ah an Krihfabu chungtel dihlak 407 an phan cang i,  an mino chungtel hi 80 hrawng an si. An Krihfabu pastor cu Rev. Dr. Si Khia a si.

Post a comment