No comments yet

Chin Christian Youth Combine Service Tin Jubilee Kan Don

Avoi 10nk Chin Christian Youth Combine Service (CCYCS) cu, Melbourne nichuah lei Croydon sang ah hrambunh mi Victorian Chin Baptist Church (VCBC) biakinn ah nuamtak le hlunghlai tak in kan tuah. Nichuah, nitlak lei ummi Chin Krihfabu in mino tampi hna nih an rak kan tel pi.

Chin Christian Youth Combine Service (CCYCS) cu Melbourne khualipi a ummi Chin Krihfabu tampi in mino hna hmunkhat ah ‘Pathian Thangthatnak’ ngeih khawhnak hnga caah rak dirhmi asi i, tukum hi kum 10 a tlinnak asi. Cu caah, CCYCS Tin Jubilee cu, Victorian Chin Baptist Church Youth (VCBCY) nih inteek tuanvo lak i, don ding in VCBC mino hotu hlun Pu Bawi Cung Nung le atu chungtuan Pu Robert Hram Hlei Cung hna nih avoi 9nak tonnak (meeting) lio ah hamnak an rak tuah. Cu hamnak an rak tuahmi cu Krihfabu dang in a rak kaimi upa hna zong nih an rak cohlan piak hna caah Victorian Chin Baptist Church nih kan donnak a si.

CCYCS ah a rak chuak khomi Krihfabu hna le an minung zat langternak. Number in a langmi khi an minung zat an si.

“Mah donnak ding caah biatak tein timhlamhnak kan ngei. Mino hruaitu hna zong tonnak (meeting) zeimawzat kan ngei. Phaisa lei siseh, a dangdang a herhmi vialte zong an tlamtling.  Sawmnak zong Krihfabu 32 sin ah kan kuat hna nain Krihfabu 20 hrawng nih rak itel ding in thawng an rak kan thanh. CCYCS cu chungtel sinak lak herhmi asi lo caah, kum dang bantuk in a dongtu Krihfabu nih sawmnak kuat in tuah than a si,” tiah VCBCY hotu Van Za Tling nih a chim.

Pumh caanhmannak zong thenthum in tuah a si. Then khatnak ah pumhnak, then hnihnak ah hawikomhnak, le then thumnak cu hlasaknak in caan an hman. Chun suimilam 12:00pm in can thok dingah rak suaisam asi nain, lamhlat in ara mi cheukhat an phak tlai deuh caah 1:00pm tuin an thok. Cazin lak khawh mi ning ahcun, Krihfabu 14 in minung 386 an rak itel kho. Hi lengah pumpak in a rak itel ko nain cazin chungah telh lomi zong an um pah hna caah, khual lawngbak minung 400 hrawng an si lai tiah kan zumh.

Then khatnak caanhman a dih in hmunkhat ah rawl ei ding in timhlamh lio. Photo – Sui Bawi Photography (2018)

Mah hi combine service timhlamhnak le tuahnak caah a dihmi phaisa cu inntek Krihfabu nih liam chung a si. Sihmanhsehlaw, Krihfabu dang in a rak itel mi hna nih an mah le siantawk cio zong in an pek ve. A pum mi hna zong nih thawhlawm pek a si. Atel mi Krihfabu le pumpak cio nih siantawk cio in pekmi Phaisa cu inteek Krihfabu sin ah luhter an si.

CCYCS (2018) ah a telmi Krihfabu hna nih mah le siantawk cio an rak i kenmi le pekmi zat.

Mino tampi hna hmunkhat ah Pathian Thangthat asi tikah, hla le ringawn lei hi biatak tein timhlamhnak an ngei. Hla le ringawn phu hna zong thla 3 chung hrawng cu cacawn Nili zaan, Zarhte le Zarhpi nii pumh dih hna ah hlacawnnak an ngei.  Ani phak lai zarh hnih chung cu zaan fatin an cawng. Anmah chung in zaan riantuan mi hna an um caah, an chuak kho tawnlo i harnak tete an ton caan zong a um. Asinain, a thabik le tlamtlinnak bik in an i zuam. CCYCS an tuahmi hi a tha tuk, mino tampi hmunkhat ah a kan tonter lawng si loin, hla kan sa, Pathian bia kan cawngtti kho hna, tiah P&W in Pi Dawt Hlei Hniang nih media sin ah a chim.

“Tukum hi avoi khatnak ka tel asi. Mino a rak chuakmi hna an thatho, an cawlcangh a dawh tukmi ka hmuh tikah ka lawm ngaingai. Inntek Krihfabu caah cun rian atam ngai ko nain retheih i khinh a phu tuk tiah ka hmuh,” tiah VCBCY Pastor Van Hei Lian nih a lawmhnak a langhter.

VCBC Biakinn chungah Krihfabu kip in a rak i pum mi hna.

VCBCY Chungtuan Robert Hram Hlei Cung nih, “Melbourne khualipi chungah hin Chin Krihfabu 35 hrawng kan um hna. Kan rak ratnak le umnak hmun hna an i dan cio tikah hmunkhat ah tling tein ton khawh hi a har tuk mi a si. Cu caah, mahhi kan tuah mi nih thlarau lei hlawknak a kan pek lawng silo in, taksa lei hrimhrim zong in hlawknak tampi kan hmuh,” tiah a chim.

Pumnak ah caan hmangtu hna zong a rak i pum mi mino deuh nih caan an hman. Athen khatnak pumhnak caah hramthawknak ah Zopuithangi (Victoria Mizo Kohhran) nih thla a cam, a pummi hna dihlak caah Rev. Japheth Lian (VCBC) nih Special Prayer a ngeih, thawhlawm caah CEC Krihfabu in Van Biak Hnin (Pa Lung), le donghnak caah Par Tha Hluan (Grace Baptist Church) nih thlacamnak a ngeih.

Chin Christian Youth Combine Service (CCYCS) cu kum fatin in Krihfabu dangdang ah tuah mi asi bantuk in avoi 11nk cu hmaikum (2019) ah Emmanuel Christian Church, Melbourne (ECCM) nih an don lai.

Post a comment