No comments yet

Chin Christian Youth Combine Service (CCYCS) Kum 10 Chung Tuanbia

Tukum cun, Melbourne Chin Krihfabu tampi chung in Mino hna tonnak lam ser piaktu, Chin Christian Youth Combine Service (CCYCS) a dirnak kum 10 a tling cang. Mahtluk a lianngan mi le Mino tampi nih kum fatin aphak lai i ngaih ngaimi CCYCS a thoknak, a tinhmi le a tuanbia theihtlak hna kan rak langhter. CCYCS rak dirh lio ah a telmi Pu Lal Lian Bawi sin in kan theih khawhtawk a si.

Chin Christian Youth Combine Service (CCYCS) cu zeidah a si?

Chin Christian Youth Combine Service (CCYCS) cu Australia ram Melbourne khualipi, nichuah le nitlak ah hrambunh mi Chin Krihfabu in Mino hna hmunkhat ah Pathian thangthatnak caah sermi a si.

CCYCS cu zeitikdah a rak i thok? Hote nih, zeitindah an rak thokmi a si?

Chin Christian Youth Combine Service (CCYCS) cu 23 March 2009 ah rak dirhmi a si. Emanuel Christian Church of Melbourne (ECCM), Victorian Chin Baptist Church (VCBC) le Chin Christian Fellowship (CCF) mino upa hna cu, Pu Lian Hnin Mang inn ah tonnak an rak ngei i, an dihlak lungtlinnak in an rak dirh. Tlawmpal a rauh hnu ah, Melbourne khualipi chung in, mino upa hna tonnak an rak ngeithan i, cu ahcun, pehtlai in kalter dingah fehternak an rak tuah. Tukum tiang Krihfabu kip ih inntek tuanvo ham in pehtlai tein kalpi peng a si.

Chin Christian Youth Combine Service (CCYCS) nih a tinhmi zeidah an si?

CCYCS nih a tinhmi hi a tlangpi in pahnih lawng an si.

  • Melbourne khualipi ummi Chin mino hna hawikomh khawhnak

CCYCS rak dirh lio ahhin, Melbourne ah khuasa mi mino hi tlawmte lawng an rak si nain, i hawikomhnak kong ah harnak tampi an rak tong. Nulepa hna karlak ah remlonak a rak cangmi thil hna an um caah, Melbourne nichuah le nitlak Chin mino hna pehtlaihnak le hawikomhnak tiang in a rak hnursuan. Cucu, hloh i mino paoh cu rualrem tein umtti le kawmh khawhnak ding hi a tinhmi pakhatnak a si.

  • Melbourne Chin mino hna hmunkhat ah pathian thangthatnak ngeih ding

Melbourne hrambunh Krihfabu chung in mino hruaitu hna tonnak an ngeihthan tikah, hmunkhat ah Pathian thangthatnak ngeih i, nulepa hna karlak ah hmuhtiam lonak vampang hrawhpiak le Mino hna rualrem tein um ding hi a tinhmi pahnihnak a si.

Chin Christian Youth Combine Service (CCYCS) nih zeitindah chungtel a cohlan i, Krihfabu zeizatdah an si? Hmunkhat pumhkhawmhnak hi teh zeitindah an tuah?

CCYCS ah cantling in cungtel sinak lak a herhlo caah chungtel a ngeimi a umlo. Melbourne khualipi ah ummi Chin Krihfabu chung in mino hna hmunkhat ah ‘Pathian Thangthatnak’ kumkhat voikhat a tuah i, inntek a hammi Krihfabu paoh nih sawmnak tuah a si. A hmasa bik hi Emanuel Christian Church, Melbourne (ECCMS) nih inntek tuanvo an rak lak i, cu hnu cun kum fatin in Krihfabu dangdang ah thial in tuah a si.

Post a comment